Еден месец онколошките пациенти ја бараат дел од терапија која недостасува.Надлежните смируваат -оваа недела ќе се потпишат договори и потребните лекови наскоро ќе пристигнат на Клиниката за Онкологија.
„Моментално тече рокот за жалби и предметот на јавна набавка во моментот е во Државната комисија за жалби по јавни набавки. Тимот за јавни набавки на УК за радиотерапија и онкологија напорно работи да ги заврши сите процедури во најбрз можен рок за да може да се потпишат договорите со дистрибутерите и лековите да се достават на УК за Радиотерапија и онкологија до крајот на неделава“, велат од ЈЗУ УК Радиотерапија и онкологија.
Станува збор за јавна набавка на лекови кои не се на позитивната листа во државата и бара поголема бирократска процедура. Менаџментот уверува дека Клиниката ќе има поголем буџет, но и 7 нови лекови за различен вид на канцер.
Денеска наидовме и на пациенти кои примаат терапија која ја има на Клиниката за Онкологија. Велат задоволни се и има ефект.
„Имаме редовно терапија. Ние сме од Кичево. Како што ни кажува лекарот доаѓаме цело време на контрола. Ние сме задоволни, не примаат, не услужуваат, каде што треба не праќаат на контроли и на снимања“, вели еден граѓанин.
„Редовно ги земаме терапиите,навремено ги даваат“, вели друг граѓанин.
Пациентите со канцер често се соочуваат со недостиг на терапија. Криза со лекови имаше и на почетокот на годината. Здруженијата и надлежните институции решението го гледаат во формирање на национален регистар на онколошки пациенти кој треба да даде точен увид во бројот на заболени но и подобро планирање на набавките за тие никогаш да не останат без терапија.
Симона Петровска