Законот за употреба на македонскиот јазик се уште низ лавиринтите на бирократските процеси за конечно да почне да се применува. Според министерот Љутков во моментов е потребно усогласување на два закона.
Година и половина по донесувањето на Законот за употреба на македонскиот јазик и неодамнешното назначување на Менче Андреева за директор на Инспекторатот за македонски јазик функционирањето на овој закон се уште е „лет во место“. Според министерот Љутков во моментов се работи на усогласување на два закона. Директорката на Инспекторатот е избрана според Законот кој што го имаме за македонски јазик, потенцира Љутков.
„Но според законот кој што е донесен 2024 та година во декември Закон за организација и работа на органите на државната управа Инспекторатот треба да биде како орган во состав на Министерството за култура и туризам од тие причини после изборот на директорката пративме до Централен регистер барање за формирање на институцијата и го чекаме одговорот. По добивање на тој одговор ќе пристапиме кон комплетно формирање на институцијата и усогласување на овие два закони, затоа што прво е донесен Законот за македонски јазик, а потоа ЗОРОДУ“ изјави Зоран Љутков, министер за култура и туризам.
Во меѓувреме ниту во Владата има лектор, ниту во повеќето државни институции. Во Законот за употреба на македонскиот јазик е предвидено стипендирање на студенти по македонистика во сите три циклуси, вработувања и ангажирања на лектори, во сите државни и јавни установи и институции, Владата, Собранието и министерствата, во медиумите, па сè до локалната власт, во универзитетите и научните институции, во основните и средните училишта.
Нина Стефанова