„Недостасува синхронизираност помеѓу партиите во Влен“, Таравари, кој е еден од лидерите, вака ги опиша односите внатре во коалицијата. Во јавноста се шпекулира дека има разидувања меѓу четирите партии, а нејасно е како тие ќе настапат на локалните избори. Но, Таравари тврди дека коалицијата, сепак, останува дел од Владата и нема други планови.
„Има едно незадоволство од функционирањето на Влен. Тоа е повеќе поради тоа што има една десинхронизација меѓу партиите коишто се дел од Влен. Тешко е кога е една партија, а камоли кога се четири. Нѝ треба подобра комуникација, впечатокот е лош кај народот дека Влен не делува како што треба во Владата. Владата има доверба од 70%, а на прашањето колку се задоволни од Вреди, одговорот е 30 и нешто проценти. Се надевам дека тоа ќе се поправи во идниот период“, изјави Арбен Таравари, претседател на Алијанса за Албанците.
Таравари зборуваше и пред неколку дена. Кажа дека во Вреди има недоразбирања, ама и конструктивност. Засега, извесно е дека коалицијата ќе настапи со заеднички кандидати за градоначалници, но неизвесни се советничките листи.
Предводникот на крилото на Алијанса за Албанците понудил две опции. Едната е сите партии да настапат одделно во трката за советнички места. Друга опција е трите партии од Вреди да бидат заедно, а Алијанса посебно.
Со тоа, јавноста започна да шпекулира дека Таравари отвора пат за соработка со ДУИ. Тој во интервју за „360“ кажа и дека имаат контакти со ДУИ, а додаде дека сите други партии од Влен комуницираат со партијата од Мала Речица. Од овој став се оградија Меџити, Касами и Ибраими.
„Демократско движење нема и нема да има никаков вид на соработка со корумпирана партија, каде нејзините врвни функционери се ставени на црната листа на американскиот Стејт департмент, за корупција“, соопштија од Демократско движење.
Од Движењето БЕСА тврдат дека ниту Биљал Касами, ниту пак било кој друг од партијата има комуникација со интегративците.
Алтернатива на Зекирија Ибраими додава – „никаква комуникација нема, на никакво ниво со ДУИ“. Спроти нив, Таравари е дециден – барем пратениците комуницираат помеѓу себе.
Петар Догов