Судирот меѓу Синдикатот и владеачката ВМРО-ДПМНЕ се продлабочува и сè поизвесно е дека во догледно време нема да има никаков договор околу минималната плата. Во седиштето на партијата продолжуваат секојдневните тематски прес-конференции за раководството на Синдикатот и нивните примања.
Пратеникот Бране Петрушевски, чија плата во Собранието е 116.000 денари без патни трошоци и додатоци и кои му се исплаќаат од Буџетот, денесka го нападна претседателот на СУТКОЗ, Стојанче Кашиковски дека примал плата од 50.000 денари и остварувал дополнителни приходи. Петрушевски кажа дека податоците ги добиле од „свиркач“ кој бил незадоволен од Трендафилов и раководството на ССМ.
Од ССМ, пак, се на ставот дека засилените притисоци од владеачката ВМРО-ДПМНЕ покажуваат дека тие се во право кога станува збор за висината на минималната плата.
Во среда ССМ излегува на улица поради едностраната одлука на Владата за зголемување на минималецот, без согласност од Економско-социјалниот совет како што предвидува законот за минимална плата и отсуството на зголемување на платите во јавниот сектор за 12,6 отсто како предвидува општиот колективен договор. Од Синдикатот најавуваат дека протестите нема да запрат тука.
Раководството на ССМ соопшти дека додека Комисијата за утврдување на репрезентативноста ги проверува доставените списоци со активни членови владејачката ВМРО-ДПМНЕ преку именуваните директори врши притисок врз членството за да го напушти ССМ.
Огнен Чанчаревиќ