Лидерката на француската екстремна десница Марин Ле Пен и осум пратеници од нејзината партија Национален собир се прогласени за виновни од судот во Париз поради проневера на јавни средства.
Судот процени дека вкупната штета изнесува 2,9 милиони евра, бидејќи пратениците на РН во Европскиот парламент вработуваат луѓе кои работат за партијата на Ле Пен.
Лидерката на РН е прогласена за виновна за проневера на 474.000 евра поради фиктивно вработување на четворица партиски помошници во ЕП.
Обвинителството претходно бараше пет години затвор за Ле Пен од кои две години ефективен и три условен, кои може да се претворат во општествено корисна работа, како и парична казна од 300.000 евра.
Пресудата против Ле Пен и пратениците ќе биде донесена подоцна и може да влијае врз нејзината евентуална кандидатура за следните претседателски избори во Франција во 2027 година.
Ле Пен пред судењето изјави дека обвинителите бараат нејзина „политичка смрт“ и оти процесот е завера РН да не дојде на власт.
Другите обвинети изјавија дека парите се легитимно искористени и оти не е точно дефинирано што работи парламентарниот асистент.