Власта во потрага по аргументи да го разреши државниот јавен обвинител, Љупчо Коцевски. Стручната фела реагира – разрешување на обвинител не е прашање на моќ туку е законски регулирано.
Ова следува откако Владата пред неколку дена покрена постапка за разрешување на Коцевски и го задолжи Министерството за правда да ги започне неопходните активности. За власта, главна причина за смена на државниот обвинител е нарушената доверба во судството.
Поранешната Врховна судијка Вера Коцо, во вчерашната Топ Тема на Телма толкува дека во моментот, судбината на државниот обвинител е во рацете на Советот на јавните обвинители.
Имаше некои превирања, расправии помеѓу републичкиот јавен обвинител и вишиот јавен обвинител. И други некои слични случувања. Како што ќе бидат квалификувани тие случувања – не знам. Сега топката е кај Советот којшто треба да одлучи дали постои некаква причина и дали за дисциплинска повреда ќе му биде изречена некаква казна или што ќе следува, тоа не знаеме. Не сме слушнале дека е член на политичка партија, поранешната врховна судијка Вера Коцо.
Според правниците, законот дава можност и начин како еден државен обвинител треба да се разрешува и кои услови треба да бидат исполнети за таква акција.
Разрешувањето на државниот јавен обвинител не е некое прашање на определена волја на определени структури на моќ туку пред сѐ е прашање коешто е строго законски регулирано. Меѓутоа, ние како јавност – и стручна и лаичка јавност, имаме еден мал проблем што работите ги набљудуваме изолирани од контекст. Тие појави надвор од контекстот немаат никаква смисла и се тотално неразбирливи, вели адвокатот Златко Јакимовски.
Пратеникот од мнозинството, Милошоски, денеска на социјалните мрежи обвини дека спогодбата со Наќе Георгиев и Иџет Мемети е аргумент плус за разрешување на Љупчо Коцевски. Во Фејсбук-статусот, тој тврди дека Коцевски е вмешан во случаите за корупција на поранешниот судија во Врховен, Георгиев, како и членот и потпретседател на Советот на јавни обвинители, Мемети.
Од Обвинителството реагираа дека тврдењата на пратеникот се невистинити, и дека јавниот обвинител ниту во наведениот предмет, ниту во било кој друг предмет не бил во ситуација на судир на интерес.
Петар Догов