Шефовите на држави или влади на земјите членки на ЕУ на вечерашната неформална средба во Брисел не успеаја да постигнат договор околу изборот на највисоките функционери во Унијата, информираше претседателот на Европскиот совет, Шарл Мишел.
Тој истакна дека политичките партии на средбата ги изнеле своите предлози за кандидатите за водечките позиции во ЕУ и врз основа на нив ќе се работи на постигнување договор.
Во игра се три имиња, како Урсула фон дер Лајен, која се надева на реизбор за шеф на Европската комисија, поранешниот португалски премиер Антонио Коста, кој претендира за претседател на Европскиот совет и естонската премиерка Каја Калас која треба да биде нов шеф на европската дипломатија.
Според Мишел, во целиот процес на носењето на оваа одлука е важна транспарентноста и во нејзиното усвојување да бидат вклучени сите 27 земји членки на ЕУ.
Изрази надеж дека лидерите на земјите членки на ЕУ сепак до крајот на јуни ќе постигнат договор околу имињата на носителите на водечките позиции во блокот.
На дневниот ред на Самитот на ЕУ следната недела ќе се најде и Стратешката агенда, која, како што рече, ќе ги дефинира насоките на Унијата во следниот период.