Денеска е последен ден до кога политичките партии и повиканите институции ќе можат да ги достават своите предлози за претставници кои ќе учествуваат во работната група која ќе ги скицира уставните измени со кои се предвидува вметнување на Бугарите во највисокиот правен акт. Од ВМРО-ДПМНЕ остануваат на ставот дека нема да учествуваат во ова тело. Убедени се дека за уставните измени нема да биде обезбедено потребното мнозинство за да можат да бидат изгласани во Собрание.
Покрај ВМРО-ДПМНЕ и демократскиот сојуз најави дека нема да испрати свој претставник во работната група, а и од Алтернатива порачаа дека без политички консензус неможе да има работни групи.
Претседателот Стево Пендаровски веќе номинираше свој претставник, а останува тоа да го сторат и Секретаријатот за европски прашања, како и Министерството за надворешни. Работната група треба да го подготви текстот на уставните амандмани, вклучително и текстот на Преамбулата за внесување на Бугарите и други помали заедници во уставот, неопходни за Македонија да почне со отворање на поглавјата во преговорите со Европската унија.