На барање на обвинителката, првото судско рочиште против Марјан Стаменковски, сопственик на порталот Доказ.мк, е затворено за јавноста.
Обвинителката објасни дека се работи за кривични дела против моралот и потребна е заштита на приватниот живот на оштетените и сведоците, бидејќи на судењето се очекува изнесување детали од животот на оштетените. Затоа, обвинителката смета дека е потребна нивна заштита кои досега преку интернет порталот биле подложни на говор на омраза, рече обвинителката и се повика на член 354 од ЗКП.
Стаменковски се товари дека преку веб порталот во негова сопственост, како средство за извршување, сторил повеќе кривични дела: две кривични дела – Ширење на расистички и ксенофобичен материјал по пат на компјутерски систем, едно кривично дело – Уцена, едно кривично дело – Пиратерија на аудиовизуелно дело и кривично дело – Злоупотреба на лични податоци.
Предметот беше оформен по поднесени кривични пријави против обвинетиот од повеќе жртви во текот на 2022 и од почетокот на 2023 година, а во врска со објавени содржини на веб порталот во негова сопственост. Пријавите се од две новинарки од неделикот „Фокус“ и еден владика.
Во меѓувреме се вештачат доказите прибавени по претресот во домот на обвинетиот по што се очекува обвинението да биде проширено а не се исклучува ни можноста со него да бидат опфатени и други лица кои соработувале со обвинетиот Стаменковски.