Шефот на руската дипломатија Сергеј Лавров и американскиот државен секретар Ентони Блинкен денеска ќе се сретнат во Женева.
Плановите се да се разговара за нацртите на двата договори што Русија ги поднесе на 15 декември, изјави синоќа портпаролката на руското Министерство за надворешни работи, Марија Захарова, пренесоа руските медиуми.
Захарова кажа дека Лавров и Блинкен пред два дена веќе имале телефонски разговор и дека Лавров го повикал Блинкен „да не шири шпекулации за наводната претстојна руска агресија“ во врска со ситуацијата во југоисточна Украина, туку да ги принуди властите во Киев целосно да го спроведат Договорите од Минск.
Тензиите за Украина се повеќе растат. Ниту една од страните не го менува ставот. Русија бара гаранции дека Украина нема да ја примат во НАТО, додека Америка и НАТО го бранат правото дека земјата сама го избира својот пат.
Блинкен во последните свои обвинувања кон Русија рече дека Москва не ги почитува начелата на светскиот поредок со тоа што трупа војници на границата со Украина, кои веќе се бројат над 100.000.
„Доколку макар и еден руски војник ја премине границата во Украина, тогаш ќе се занимаваме со сериозен проблем“, рече Блинкен, кој истакна дека сутуцијата со Украина е многу поголема од конфликтот меѓу двете земји.
„Проблемот е поголем од Русија и НАТО. Тоа е криза со глобални последици“, рече Блинкен.