Котлар за 100 дена ќе ги решава проблемите на пазарџиите, Герасимовски ветува дека граѓаните кои живеат околу Зелениот пазар ќе добијат решение за хаосот од оставеното ѓубре.
Лидерот на ВМРО-ДПМНЕ Христијан Мицкоски денеска во кампањата пред вториот изборен круг, го посети Зелениот пазар во центарот на Скопје заедно со кандидатката за градоначалник на Центар Наташа Котлар. Разговараа со пазарџиите и ветија решение за нивните проблеми со кои се соочени.
-Од тоа што можев да го слушнам е нормално сето она што денеска го живееме во ова нашето тешко секојдневие, беспарица голема, лош стандард, цени високи. Они имаат и поинаков проблем овдека до пристапот до пазарчето наметнати паркинзи, наметнати огради и бариери за да не можат луѓето да доаѓаат да пазаруваат нормално. И сето тоа создава проблем не само за нив, туку и за граѓаните во овој регион. Она кое што ние можеме да го кажеме е дека сето тоа кое што претставува проблем за луѓето за тука, за пазарџиите, за луѓето кои што пазаруваат тука од овие пазарџии е дека ќе сториме се што е во наша моќ, уште во првите 100 дена сите оние проблеми со кои што тие се соочуваат и кои што денеска тие ни ги кажаа да ги решиме. Да покажеме дека можело поинаку, дека може да се работи за интересот на граѓаните, бидејќи ние како ВМРО-ДПМНЕ сме народна партија, истакна Мицкоски во порака на својот ФБ профил.
Кандидатот за градоначалник од СДСМ Герасимовски пак вели дека Мицкоски и Котлар воопшто не знаат кои се приоритетите и проблемите на граѓаните кои живеат кај Зелен пазар и наместо решение нудат ветување кои дополнително ќе им го отежне секојдневнието.
-На граѓаните кај Зелен пазар ќе им го решиме проблемот со хигиената и хаосот кој се создава од пазарџиите кои продаваат надвор од тезгите. Најстрого ќе се санкционира и редовно контролира нарушувањето на мирот на граѓаните, продажбата на диво и валкањето на околината. Понатаму, ќе ги исчистиме и уредиме подземните паркинзи и ќе воведеме целосен ред во паркирањето. Ова е врвен приоритет за граѓаните кои живеат таму и ќе го решиме во првите месеци од мандатот. Пазарџиите кои уредно продаваат и плаќат за тезгите ќе добијат субвенции за наем на тезгите и за паркирање. Со тоа ќе стимулираме регуларна продажба а ќе ги отстраниме пазарџиите кои продаваат на диво. На Зелен пазар ќе воведеме ред и еднакви услови за пазарџиите, а чиста и безбедна средина за граѓанite кои живеат таму. Мицкоски и Котлар тропаат на погрешна врата и јасно е дека не знаат што е потребно за граѓаните на Центар, рече кандидатот на СДСМ Горан Герасимовски.