„Секој има право да се жали, но Судскиот совет не би донел одлука без да ги разгледа сите аспекти„.Вака министерот за правда ја коментира најавата за жалба од судијката Весна Кичеец која беше разрешена поради несовесно и нестручно постапување.
Судијката Кичеец од Основниот суд во Охрид, Судскиот совет ја разреши поради процесот за убиството на охриѓанецот Димитар Матилоски, кој беше претепан до смрт од страна на српски државјанин на новогодишната ноќ во 2016 година, во центарот на Охрид. Советот утврдил грешка во нејзиното работење поради неитно постапување, со што на обвинетиот Бојан Угреновиќ му истекол притворот и излегол на слобода, по што избега од Македонија. Во отсуство, беше осуден на 16-годишна затворска казна, но никогаш не ја одлежа.
Судијката тврди дека, одолговлекувањето на случајот не е нејзина вина. Донела пресуда за само месец и половина, но за Апелација од Битола казната била висока. Ја укинале пресудата, а казната била намалена на 8 години затвор. Но, Врховен суд ја преиначил таа одлука и повторно изрекол 16 години. Сепак, во меѓувреме, виновникот избегал.
Министерот тврди дека веројатно ќе има уште вакви случаи, но секој може да се жали.По Нова година, прочистувањето во правосудството ќе се засили, а ќе следи и ЕУ-мониторинг на случаите на висока корупција. Во планот на министерството за идната година се и измени во Изборниот законик, но не е сигурно меѓу нив ќе се најде моделот на една изборна единица.
Следната година ќе се менува и Кривичниот законик, ќе има повисоки казни, особено за загадувачите на животната средина, но конфискацијата на имот за случаите на висока корупција, не е во приоритетите. Пописот останува во план за април следната година.
Далиборка Демјанска