Првиот човек на Олимпиското движење, Томас Бах на почетокот од Генералното собрание најави дека е подготвен за уште еден мандат на претседателската функција.
За прв пат во историјата собранието се одржува по пат на видео конференциска врска, а во своето воведно обраќање Бах изјави дека е подготвен да остане на чело на Интернационалниот олимписки комитет каде се наоѓа веќе седум години, наследувајќи го Жак Рог.
Бах истакна дека е загрижен поради злоупотребата на спортот во политички цели и дека токму поради тоа стравува од можни бојкоти на Олимписките игри во иднина. На крајот Бах рече дека организацијата на Игрите во Токио следната година ќе бидат огромен предизвик за сите, но верува дека со помош на сите искрени пријатели на олимпиското движење се ќе мине без поголеми проблеми.
На денешното собрание за нови членови на Интернационалниот олимписки комитет беа избрани Себастијан Коу и поранешната претседателка на Хрватска, Колинда Грабар Китаровиќ, а Џон Коутс од Австралија и Нг Сер Мианг од Сингапур се новите потпретседатели на олимпиското движење.