Со водени топови беа пречекани германските пожарникари и претставници од амбасадата кои на Доброволното противпожарно друштво во Кочани му донираа ново возило и опрема. Возниот парк на волонтерите пожарникари се зголеми на шест, од кои сега имаат четири противпожарни камиони. Ова е единственото возило за кое не е платено данок од страна на Доброволното противпожарно друштво, целиот трошок и процедура ја имаат истуркано токму хуманите луѓе од Германија. Законите не ја препознаваат хуманата дејност на волонтерите пожарникари при интервенции на пожари и елементарни непогоди, ниту пак при добивање на вакви донации.
Интервентната доброволна противпожарна единица на Кочани брои 25 волонтери. Формирани се пред четири години по големиот пожар на Илинден. Нивните камиони и опрема се во истиот круг со Територијалната Противпожарна единица Кочани која, пак, брои само 16 пожарникари, чија просечна старот е 48 или 49 години. Оваа единица кои ги гасне пожарите во Кочани, Чешиново-Облешево и Зрновци има и стар возен парк, најновиот камион им е од пред 15 години.
Во оваа Противпожарна единица треба да има 32 пожарникари, во моментов функционира со 45 отсто од предвидениот законски Правилник за пожарникарство. Кочанските пожарникари и волонтерите пожарникари на терен заеднички ги гаснат пожарите и се едни од ретките во земјава, кои соработуваат и не сметаат за конкуренција.
Вршителот на должност градоначалник на Кочани, Венко Крстевски најави дека оваа седмица ќе се распише оглас за вработување на двајца пожарникари, а се работи и на обезбедување на средства за ново стандардизирано возило.
Викторија Јованова