По неколкучасовна битка со разбеснет оган, доцна синоќа се локализираше пожарот во струмичката населба Софилар. Со многу напори и малку среќа, силниот ветер не го пренасочи огнот во правец на населениот дел, па се спречи проширување на огнот кон домовите на струмичани и на жителите од селото Баница. Опасноста беше на дофат. Граѓаните немоќно од терасите гледаа како им се приближуваат пламените јазици. Сомнежот на граѓаните е дека пожарот е подметнат од несовени граѓани, бидејќи не бил прв случај.
Полицијата не дозволуваше интервенции од цивили. Местото е со високи трски и сува трева и мрачно. Нема услови за безбедно движење на несоодветно опремени и обучени лица, затоа сите мораа да се повлекуваат во безбеден појас. Работата ја завршија струмичите пожарникари кои сите до еден се бореа на огнената линија долга неколку километри. Во непосредна близина на просторот каде се движеше огнот се наоѓа и новата населба со десетици станбени згради. Доцна синоќа градоначалникот соопшти дека граѓаните, сепак, можат мирно да ја поминат ноќта.
Поради сериозниот предизвик да се спасат домовите и имотот на граѓаните од опожарување и директорот на Центарот за управување со кризи (ЦУК) синоќа пристигна во Струмица. Силниот ветер бргу го ширеше огнот во повеќе правци, па се мобилизираа и противпожарните екипи од Валандово, Радовиш и Богданци.
ЦУК денеска информираше дека само во овие три седмици од март имало вкупно 484 пожари на територијата на Македонија. Од нив, само 20-тина биле шумски, сите други се пожари на отворено: сува висока трева, стрништа, нискостеблеста и деградирана шума и ѓубришта.
Вчера, во земјава имало 28 пожари. Во текот на денот се локализирани сите освен еден, на скопската депонија Дрисла, кој и денес е активен.
Сузана Мицева