Жртвите молчат, возрасните околу нив не секогаш препознаваат дека нешто се случува. Клучна е превенцијата кога децата си ги знаат своите права, а возрасните знаат како да реагираат и каде да пријават.
Сексуалното насилство врз деца се појавува во многу форми, но ретко кој го пријавува, констатираат надлежните.
- „Тука спаѓаат сексуална злоупотреба, детска порнографија, сексуална експлоатација, онлајн вознемирување. Во повеќето случаи сторителот му е познат на детето, а во некои од случаите детето има стекнато голема доверба во детето“, изјави Барбара Лигл, лидерка на компонентата за фундаментални и човекови права на проектот „Поддршка на ЕУ за владеење на правото“.
Едно од пет деца во Европа е жртва на некаков облик на сексуално насилство, предупредуваат статистиките на Советот на Европа. Зад овие бројки стојат деца кои често молчат од страв, срам или затоа што не знаат каде да се обратат.
Иако проблемот е широко распространет во европските земји, во Македонија досега не е поднесена ниту една претставка до Комисијата за спречување и заштита од дискриминација за сексуално вознемирување на деца.
- „Комисијата досега нема пријави за сексуално вознемирување. Мислам дека се уште е ниска свесноста и постои страв од пријавување“, изјави Душан Томшиќ, претседател на Комисијата за спречување и заштита од дискриминација.
Од Комисијата велат дека тоа не значи дека нема случаи туку дека децата и родителите се уште немаат доволно свест за препознавање на сексуалното вознемирување, ниту пак доверба дека институциите ќе реагираат соодветно.
- „Народниот правобранител често укажува дека децата жртви на насилство имаат двојни трауми. Од самото насилство и од нечувствителниот институционален одговор“, изјави Соња Трифуновска, заменик народен правобранител.
По повод Светскиот ден за превенција од сексуална експлоатација, злоупотреба и насилство врз деца, започна и националната кампања „1 од 5 – стоп за сексуалното насилство врз деца“.
Тамара Марковска
Б.С.