Граѓанската организација „Здрава котлина“ му поднесе кривична пријава на градоначалникот на Ново Село, Ѓорѓе Божинов за случајот со леарницата кај Смоларе. Овој чекор доаѓа откако повеќе активисти добиле кривични пријави и биле влечени во полиции и јавно обвинителство за напишан статус на Фејсбук, сметајќи ги за класични слап тужби со цел да се замолчат.
Активистите велат дека повеќе од една година протестираат и апелираат да се забрани натамошната изградба и функционирање на објектот што го сметаат за опасна Г1 тешка индустрија кој треба да се отвори во непосредна близина на единственот извор на вода за Општината. Образложението на кривичната пријава е на 120 страници.
Градоначалникот на Ново Село смета дека нема основа за кривична пријава. Работел според закони и прописи. Тој тврди дека чистата животна средина е приоритет на локалната самоуправа и дека сите објекти кои ќе бидат на територијата на општината ќе мора да гарантираат безбедност.
Објектот на влезот на Смоларе ги загрижува еко-активистите, тие сметаат дека на таков индустриски капацитет не му е местото во подножјето на планината Беласица.
Сузана Мицева