Москва ги отфрли тврдењата на Киев дека кинески државјани се борат заедно со руските сили во Украина. Тоа не е точно, изјави за руските медиуми портпаролот на Кремљ Дмитриј Песков. Песков рече дека Кина има „урамнотежена“ позиција во војната, иако Кина е „стратешки партнер и пријател“ на Москва.
Неговата изјава следеше откако украинскиот претседател Володимир Зеленски обвини дека кинески борци учествуваат во конфликтот на страната на Русија. Ваквата информација дојде откако украинските сили заробија двајца кинески платеници и објавија видеоматеријали и интервјуа со нив.
И покрај декларираната неутралност, Кина се соочи со критики за испорака на стоки во Русија кои се сметаат за витални за нејзиниот воено-индустриски комплекс, како што се компонентите што се користат во производството на дронови.
Зеленски тврди дека до сега Киев идентификувал 155 кинески државјани кои се борат на страната на Русија. Украинскиот претседател рече дека нивното присуство е во спротивност со официјалната позиција на Пекинг за неутралност и неговите постојани повици да се избегне ескалација на војната. Кина категорично ги отфрли наводите на Зеленски.