Американскиот претседател Доналд Трамп изрази забелешки кон рускиот претседател Владимир Путин за коментарите што ги даде за Украина и нејзиниот претседател Володимир Зеленски. Мислејќи на коментарите на Путин дека го смета Зеленски за некредибилен, Трамп рече дека тој треба да склучува договор со него, „без разлика дали ви се допаѓа или не“.
Путин го повтори своето тврдење дека Зеленски, чиј мандат истече минатата година, нема легитимитет да потпише мировен договор. Сепак, Трамп повтори дека тој и Путин имаат „многу добри односи“ и префрли дел од неговите критики на Зеленски.
Портпаролот на Кремљ изјави дека Путин останува отворен за каков било контакт со американскиот колега Доналд Трамп. Дмитриј Песков истакна дека засега не е планиран разговор меѓу двајцата лидери.
Трамп во вчерашното интервју за „Ен-Би-Си“ изјави дека е „многу изнервиран“ и „бесен“ на Путин и се закани дека ќе воведе нови царини на руската нафта. Ако Русија и јас не сме во можност да постигнеме договор за завршување на крвопролевањето во Украина, а верувам дека тоа е руска грешка, ќе воведам секундарни царини на целата нафта кој излегува од Русија, посочи Трамп и најави разговор со Путин следните денови. Путин неодамна го отфрли предлогот на Трамп за безусловен прекин на огнот во Украина, кој Киев го прифати под притисок на САД.