По денешната седница на владата, прес службата на кабинетот на Мицкоски објави дека е почната постапка за враќање на оградата околу владиниот објект на Илинденска.
-Со оглед на тоа што досега објектот на Владата е опркужен со нефункционална и нерепрезентативна ограда во сопственост на МВР, Владата ја задолжи Службата за општи и заеднички работи СОЗР да започне постапка за враќање на оградата на Владата која веќе еднаш беше поставена. Истовремено директорот на СОЗР Ивица Томовски информираше дека оградата била несоодветно чувана под надворешни влијанија во објектот на касарната Илинден, за што ќе направат и дополнителна проценка, соопшти владата.
Оградата беше поставена за време на претходната влада на ВМРО-ДПМНЕ кога премиер беше Никола Груевски. Објектот беше реновиран во барок стил, под фасадата беше ставен стиропор, а околу објектот и дворот беше изградена оградата од бела поплочена основа и со ковано железо. Едно од образложенијата за оградата беше и зголемување на безбедноста на владата.
Иако тогаш имаше протести бидејќи дел од владиниот двор беше користен и за поминување на граѓаните, кованата ограда издржа до промената на власта и во времето на кабинетот на Заев и СДСМ, таа беше отстранета од пред владиниот објект. Само делот со кованото железо беше префрлен во касарната Илинден, но поплочената основа остана со столбовите.
Александар Пандов назначен за нов директор на затворската Управа