Истокот во срцето на Осоговските планини ќе добие модерен ски центар. На Царев врв на надморска височина од 2.085 метри се предвидува изградба на еден од петте најголеми ски центри на Балканот, со девет жичари и три ски лифтови. Државата издвои шест милиони денари за ажурирање на физибилити студија и идеен проект за Урбанистички план.
Доколку се реализира овој проект, шанса за развој на ски туризмот ќе имаат општините Македонска Каменица, Кочани, Крива Паланка, Пробиштип и Кратово. Според директорката на Центарот за развој на Источно планскиот регион, Зуица Ангелова за 6 месеци треба да биде завршена документација.
Ски центарот ќе се гради по принцип на јавно –приватно партнерство, а првично проценетата вредност на инвестицијата е 120 милиони евра. На истокот има само еден ски центар, а тоа е Пониква, каде што изминатите години се изградија голем број на викенд куќи, а се отворија и угостителски објекти.
Викторија Димитрова Јованова