Македонската ракометна репрезентација вечерва во 20:15 часот гостува кај Луксембург во рамки на претпоследното коло во квалификациите за Европското првенство. Потребни ни се две победи за да го завериме пласманот на турнирот во Германија што ќе се одржи идната година во јануари.
Квалификациите ги почнавме со две лесни победи против Луксембург дома и Турција на гостински терен, па сега против овие два противници ќе мораме повторно да победиме за да го завериме второто место на табелата во групата 1. Во март ги загубивме двата дуели со Португалија, па очекувано немаме шанси за првото место.
Селекторот Кирил Лазаров сега повторно на располагање ги има Филип Талески и Гоце Георгиевски, кој ќе ги одигра последните два репрезентативни натпревари по што најави пензија. Лазаров за вечерашниот натпревар од оние ракометари кои отпатуваа за Луксембург надвор од составот ги остави Давид Савревски и Павле Атанасијевиќ.
Во недела во Скопје го играме последниот натпревар во овие евроквалификаци, кога во „Борис Трајковски“ ја пречекуваме Турција со почеток од 18 часот.