Запалените хали останаа да чадат до доцна во ноќта, по синоќешниот пожар во кругот на фабриката „Треска“.
Стопените кабли, машини, мебел и остатоци од поранешниот индустриски гигант останаа под присмотра на пожарникарите кои будно дежураа цела ноќ па сè до рано утрината, за да спречат некоја скриена искра повторно да го разгори огнот.
Половина Скопје синоќа го виде и помириса чадот којшто се издигна високо над распаднатите објекти кои некогаш биле погон за производство.
Но, само пожарникарите рано утрово успеаа да ги видат пламените јазици коишто се појавиле на место недалеку од таму каде што најмногу гореше синоќа.
Со брза интервенција веднаш спречиле повторно да избувне пожар.
„СЕ РАБОТИ ЗА ГОЛЕМО ПРОСТРАНСТВО ОДНОСНО ПОГОЛЕМА ПОВРШИНА. НА СОСЕМА ДРУГИОТ КРАЈ ОД ФАБРИКАТА СЕ ПОЈАВУВА НОВ ПОЖАР КОЈ ЗА СРЕЌА Е БРЗО ИЗГАСНАТ. МОРАВМЕ ДА ДЕЖУРAME ЗА СЕТО ТОА ДА СЕ САНИРА И ДА НЕ СЕ ПОВТОРИ РАЗГОРУВАЊЕТО БИДЕЈЌИ ВО БЛИЗИНА ИМА И СТАРИ РЕЗЕРВОАРИ ЗА НАФТА, ЗА БЕНЗИН, ПА МОРАШЕ ДА СЕ ОДРЖИ ЦЕЛАТА ТАА ТЕХНИКА КОЈАШТО БЕШЕ ПОСТАВЕНА. МОРАШЕ ДА СЕ НАПРАВИ ДЕЖУРСТВО ЗА ДА БИДЕ БЕЗБЕДНO ЗА ОКОЛНИТЕ КУЌИ ВО БЛИЗИНА“ ИЗЈАВИ ЅВОНКО ТОМЕСКИ, КОМАНДИР НА ТППЕ-СКОПЈЕ.
Дали бил заштитен имотот и какви безбедносни ризици имало по околината со оглед на тоа што тлееле лесно запалливи материи и пожарот може да биде со далеку пострашни последици – одговара стечајниот управник на „Треска“.
Вели, сопствениците на имотот се тие коишто имаат одговорност за тоа.
„НЕМА НИКАКОВ ИМОТ ВО СТЕЧАЈНАТА МАСА НА „ТРЕСКА“ КОЈ ЈАС КАКО СТЕЧАЕН УПРАВНИК СУМ ТРЕБАЛ ДА ГО ЗАШТИТАМ. ИМА И ЗАПИСНИК, НАЈГОЛЕМИОТ ДЕЛ ОД ОКОЛУ 92% Е ПРЕДАДЕН ВО ВЛАДЕНИЕ НА ЛИЦЕ КОЕ ГО ДОБИЛО СО ДЕНАЦИОНАЛИЗАЦИЈА. ОСТАНАТИТЕ 8% СЕ ПРОДАДЕНИ ОДАМНА И ИМААТ ДРУГИ СОПСТВЕНИЦИ. ОНА ШТО ОСТАНУВА Е УШТЕ ДОКУМЕНТАЦИЈАТА ЗА ЛИЦАТА КОИ РАБОТЕЛЕ ТАМУ, КОЈА ТРЕБА ДА СЕ ПРЕДАДЕ ВО АРХИВ И ПОТОА ДА СЕ ПРИЈАВИ ВО ФОНДОТ ЗА ПЕНЗИСКО И ИНВАЛИДСКО ОСИГУРУВАЊЕ, ЗА ДА МОЖЕ ДА ГО РЕГУЛИРААТ СТАЖОТ. СТАНУВА ЗБОР ЗА ПЕРИОДОТ ОД 1994 ДО 2005 ГОДИНА КОГА „ТРЕСКА“ ОДИ ВО СТЕЧАЈ. ДОСЕГА СЕ ИСПЛАТЕНИ ОКОЛУ ТРИ МИЛИОНИ ЕВРА ЗА НЕИСПЛАТЕНИТЕ ПРИДОНЕСИ ЗА ПОРАНЕШНИТЕ ВРАБОТЕНИ, НО ОСТАНУВААТ УШТЕ НЕПЛАТЕНИ ПРИДОНЕСИ ЗА ЕДНА ГОДИНА“ ВЕЛИ РАДОСАВ ЌИПРОВСКИ ЗА ТЕЛМА, СТЕЧАЕН УПРАВНИК НА „ТРЕСКА“.
Синоќа не беше ниту целосно локализиран пожарот кога веќе почнаа да се шират гласините на јавноста.
Нов пожар – нови згради, покажала досегашната пракса низ годините. Граѓаните се прашуваат дали пожарот е подметнат и со кои намери. Вчера градоначалничката на Скопје кажа дека има докази и дека основани се сомнежите, за тоа дека овој пожар е подметнат од некого.
А, Јане Димески, советник во Центар и началник на Штабот за заштита и спасување во општината, вели дека таков простор среде центарот на градот, не треба да биде бетонизиран на секоја педа.
Веќе имаше конкурси и се бараа идејни решенија за тоа како похумано да се уреди просторот.
„ИДЕЈНОТО РЕШЕНИЕ Е ДАЛЕКУ ПОДОБРО ОТКОЛКУ ПОСТОЕЧКИОТ ПЛАН. ПРЕТХОДНИОТ ГРАДОНАЧАЛНИК РЕЧЕ ДЕКА СЕ ПРЕДВИДУВААТ ЗГРАДИ КАКО НАПОЛИТАНКИ, ЦЕЛИОТ ПРОСТОР ДА БИДЕ ПОКРИЕН СО ЗГРАДИ. СЕГАШНИОТ ГРАДОНАЧАЛНИК ТВРДИ ДЕКА ТАМУ ИМА ПРОСТОР ЗА ПАРК МЕЃУТОА НА ТОА ПОДРАЧЈЕ КАДЕ ШТО Е ПЛАНИРАН ПАРК СПОРЕД ПОСТОЕЧКИОТ ПЛАН, КОЈ ПАТЕМ ТРЕБА ДА СЕ СМЕТА И ЗА НЕЛЕГАЛЕН ЗАТОА ШТО ГО ПРОБИВА ГЕНЕРАЛНИОТ УРБАНИСТИЧКИ ПЛАН И ЗАКОНСКИ НЕ ТРЕБА ДА СЕ СПРОВЕДУВА ВООПШТО, ЗНАЧИ НА МЕСТОТО КАДЕ ШТО Е ПРЕДВИДЕН ПАРК ИМА ОБЈЕКТИ КОИШТО ВО МОМЕНТОВ СЕ ЛЕГАЛИЗИРАНИ И ОПШТИНАТА ЌЕ ТРЕБА ИЛИ ДА ГИ ОТКУПУВА ИЛИ ЌЕ МОЖЕ И ТИЕ ДА ПОБАРААТ ДА СЕ ГРАДИ КАЈ НИВ“ ИЗЈАВИ ЈАНЕ ДИМЕСКИ, СОВЕТНИК ВО ЦЕНТАР ОД СОВЕТНИЧКАТА ГРУПА НА „ШАНСА ЗА ЦЕНТАР“ И НАЧАЛНИК НА ШТАБОТ ЗА ЗАШТИТА И СПАСУВАЊЕ ВО ОПШТИНАТА.
Во меѓувреме, се отвори и едно друго прашање.
Поранешните работници од фабриката, коишто се огромна бројка и се над петстотини велат дека пред само две недели биле на средба со стечајниот управник, за повторно да си ги бараат назад платите коишто не ги добиле.
Се сомневаат дека актуелните случувања во „Треска“ можеби се поврзани со тоа.
„ОВА СЕТО ГО РАСПРОДАВААТ, ГО ПАЛАТ… НЕКОЈ САКА НЕШТО ДА НАПРАВИ! САКАМЕ ДА ЗНАЕМЕ КОЈ ГО ЗАПАЛИ СЕТО ОВА?! САКАМЕ ДА ЗНАЕМЕ ЗАТОА ШТО СМЕ МНОГУ РЕВОЛТИРАНИ. ШТОМ ГИ ПРИТИСНЕМЕ, ОВДЕ НЕШТО СЕ СЛУЧУВА. А, ОВА НЕ Е ПРВПАТ „ТРЕСКА“ ДА ГОРИ“ ИЗЈАВИ ВИОЛЕТА АТАНАСИЕВА, ЗАСТАПНИК НА РАБОТНИЦИТЕ ОД „ТРЕСКА“.
Од Центарот за управување со кризи се прогласија за ненадлежни за оваа и ваквите слични ситуации иако синоќешниот пожар беше огромен, а домовите на локалните жители беа недалеку.
Главниот товар го имаат општините, вели директорот на ЦУК, Ангелов. Според него, ако општинските територијални противпожарни единици не успеваат да стигнат со своите капацитети, тогаш се бара помош и од соседните општини.
Доколку и тоа не е доволно, тогаш се бараат дополнителни интервенции од државните институции.
Петар Догов