Австралискиот премиер Скот Морисон ја повика Кина да се приклучи на глобалните напори за ставање крај на руската инвазија на Украина, бидејќи смета дека нема земја што ќе има поголемо влијание од Кина на крајот на војната во Источна Европа.
Во опширниот говор, австралискиот премиер посочи дека руската инвазија не оди според планот на нејзиниот лидер Владимир Путин, за кој рече дека „го преценил капацитетот да ја гони оваа незаконска војна“.
„Кина долго време тврдеше дека една од најголемите светски сили треба да придонесе за глобалниот мир и стабилност. Нема земја која ќе има поголемо влијание врз завршувањето на оваа ужасна војна во Украина од Кина“, рече Морисон во говорот во Институтот Лови во Сиднеј.
„Застрашувачка тишина“
Морисон, чија влада се судри со најголемиот извозен трговски партнер поради низа прашања, рече дека е згрозен од воздржаноста на Кина.
„Го слушав гласот на кинеската влада кога се работеше за осуда на руските дејствија и имаше застрашувачка тишина“, рече тој.
Кина одби да го нарече рускиот напад врз Украина инвазија, додека од западните земји побара да ги почитуваат руските „легитимни безбедносни грижи“. Таа повика да се стави крај на кризата преку преговори.
Русија ја нарекува инвазијата, која започна на 24 февруари, „специјална воена операција“, а Морисон ја опишува како „грубо кршење на меѓународното право“ и „последниот пример на авторитарен режим кој се обидува да го оспори статус квото со закани и насилство.
Списокот на земји кои воведуваат санкции кон Русија секојдневно се зголемува, но на него сè уште ја нема Кина. И покрај тоа, Морисон смета дека „нема сомнеж дека господинот Путин не го постигнува она кон што се стремел“.
„Мислам дека тој го прецени капацитетот да ја гони оваа незаконска војна. Начинот на кој ги испрати младите регрути во огнот, не гледам како тоа може позитивно да одекне во Русија“, рече Морисон.