Буџетот е ликвиден, пари има за справување со последиците врз домашната економија од руско-украинскиот конфликт – уверува првиот финансиер Фатмир Бесими. Тој не откри дали се планира ребаланс на буџетот, колку дополнително пари би биле потребни за справување со оваа нова криза, ниту дали и кога ќе се интервенира со стоковите резерви како што бара бизнисот, за да се спречи нов ценовен шок за компаниите и граѓаните.
Тврди ситуацијата секојдневно се следи. Уверува дека денарот и финанасискиот систем ќе останат стабилни и апелира да не се дига паника.
Бизнисот пак веќе алармираше дека состојбата е сериозна. Побара веднаш да се активираат стоковите резерви.
Русија и Украина обезбедуваат 30 проценти од потребите за живот во светот, како и голем дел од потребата за енергенси. По вчерашниот шок на светските берзи веднаш по руската инвазија на Украина и галопирачкиот скок на цените на нафтата, гасот, златото, металите денеска има блага стабилизација на безите. Прогнозите на светските економисти се дека – глобалната економија би можела да доживее голема криза. Предупредуваат на опасност од нагло зголемување на инфлацијата и рецесија.
Александра Филиповска