Турски суд му одреди притвор пред судењето на основачот на турската опозициска Партија за демократија и напредок (ДЕВА), Метин Гурџан, поради „политичка и воена шпионажа“, јави турската новинска агенција Анадолија.
Гурџан е пензиониран офицер на турските вооружени сили, воен аналитичар заслужен за основањето на ДЕВА заедно со Али Бабаџан, поранешен вицепремиер и министер.
Бабаџан во телевизиско интервју наведе дека неговата партија го поддржува Гурџан и дека партиските адвокати ќе го бранат „до крај“.
– Неговата работа се заснова на отворени извори. Тој нема пристап до државните тајни, истакна Бабаџан, кој минатата недела истакна дека приведувањето на Гурџан е обид да се одвлече вниманието од економската криза, обележана со падот на вредноста на турската валута на најниско ниво во историјата.