Штипските советници од ВМРО ДПМНЕ сепак ќе ги коригираат свечените изјави со уставното име на државата.
Координаторот на советничката група, Душко Иванов вели дека тоа ќе го сторат во интерес на граѓаните и да не се изрече мерка „забрана за прописи“, што ќе значи блокада на општината и работата на градоначалникот.
Но, стојат на ставот дека нема да ја повторат конститутивната седница иако пишува во решението на инспекторат за локална самоуправа.
Одговорот по жалбата ќе го чекаат, а потоа ќе постапат.
Деветмината советници на СДСМ стојат цврсто на ставот дека свечените изјави треба да се потпишат на нова конститутивна седница на Советот и сите одлуки кои досега се донесени, да се повторат, како што се избор на претседател на советот, ребаланс на буџет, разрешување на стари и именување на нови членови на управните одбори во училиштата и градинките.
„Она што отвара сомнеж е фактот дека иако решението беше доставено до Општина Штип на 12.11.2021,истото е архивирано од страна на општината 16.11.2021, остава впечаток дека мнозинството на овој начин се обидува да манипулира со одлуПките донесени на втората и третата седница, под изговор дека во моментот на нивното донесување тие се уште немале насока на кој начин да постапат“, вели Маријана Рогожарска Поповска, координатор на советничката група на СДСМ.
Левица е на ставот дека нејзините советници не ги потпишуваат изјавите со придавката Северна.
Засега позицијата и опозицијата се надмудруваат, но доколку продолжат во овој стил можат да го доведат во прашање и донесувањето на буџетот на општината за наредната година.
Викторија Јованова