Денеска се одбележува, државниот празник 11 Октомври – Ден на народното востание со кој во 1941 година беше означен почетокот на народно-ослободителната војна и заокружувањето на раѓањето на македонската држава.
Претседателот Стево Пендаровски и премиерот Зоран Заев се на централната прослава која е организирана на Могилата на непобедените во Прилеп, каде на овој ден пред 8 децении, народното востание почнува со напад врз бугарскиот участок во центарот на градот.
Покрај во Прилеп, и во Куманово се одава почит на двата партизански одреди кои на 11-ти октомври 1941-ва ја почнале битката за ослободување.
Востанието и борбата ќе се крунисаат на Илинден 1944-тата кога на заседание на АСНОМ во Прохор Пчински се носат одлуките за формирање на државните институции. Во 4-годишните борби, загинале околу 25 илјади луѓе.
8-децениската прослава се случува среде кампања за локалните избори, но и во време на бугарските барања за поинакво толкување на историјата од периодот на Втората светска војна.
Инаку, на прилепската Могила на непобедените, десетина луѓе од кои некои со партиски симболи беа наредени пред местото каде се поставуваат венците свежо цвеќе за одбележување на празникот, а државните делегации со претседателот Пендаровски и премиерот Заев ја заобиколија групата за да ги положат венците.