Премиерот Заев, пак, денеска на маргините на Самитот ќе има средби со бугарскиот претседател Румен Радев, словенечкиот премиер Јанез Јанша, еврокомесарот за проширување Оливер Вархеји, германската канцеларка во заминување Ангела Меркел и претседателот на Франција Емануел Макрон.
Од Влада информираа дека Заев ќе има заедничка работна средба со Макрон, Меркел и Радев. Заедничка средба на Заев и Радев е предвидена и со Јанша и Вархеји. Заев посебна билатерлна средба ќе има со потпретседателот на Европската комисија и висок претставник за надворешна политика на ЕУ, Жозеп Борел. На маргините на Самитот премиерот Заев ќе има билатерални средби и со премиерката на Естонија, Каја Калас и премиерот на Ирска, Мајкл Мартин.
Средбите се можност за придвижување на процесот на решавање на спорот меѓу Северна Македонија и Бугарија и изнаоѓање на конструктивно решение, кое ќе овозможи кревање на бугарското вето и одржување на првата меѓувладина конференција со земјава во декември.
За средбите вчера потврди и самиот Заев, кој посочи дека на нив ќе се разговара за изнаоѓање решение.
– Сакам да потврдам дека утре рано со работен појадок почнувам состанок со комесарот Вархеји и премиерот на Словенија како земја претседавач со Европскиот совет и заедно со претседателот Румен Радев, секако тие до крај треба да бидат потврдени, но во агендата веќе се вклопени. Веднаш потоа ќе имам состанок со канцеларката Меркел, со претседателот Макрон и претседателот Радев. Секако, знаете дека ќе разговараме за изнаоѓање на решение и уште еднаш да ја испратиме позитивната порака и на билатералното пријателство, добрососедство и соработка, но и заложбите на Бугарија за интеграција на Западен Балкан во ЕУ, како и на Северна Македонија конечно да го направи чекорот којшто толку долго го очекува, истакна вчера Заев.
Премиерот повтори оти е оптимист и оти тоа го поткрепува со аргументи и чекори и одлуки што, како што рече, прво значат конкретно заштита што е за нас важно, а тоа е нашиот идентитет, нашиот македонски јазик, Македонци како народ, но истовремено и изнаоѓање решение.
Пендаровски вчера од Атина говорејќи за ситуацијата со Бугарија, објасни дека спорот треба да се реши пред сѐ билатерално.