Oваа есен проблем ќе имаат оние кои не се вакцинирани, предупредува директорот на Институтот за имуно-биологија, доктор Александар Петличковски. Во интервју за Телма, вели дека ситуацијата ќе се подобри кога 70 насто од населението ќе биде вакцинирано против ковид. Со д-р Петличковски разговараше Нина Стефанова.
Професоре Петличковски загрижувачка е состојбата со Делта сојот во земјава, бројот на заразени секојдневно расте, воедно висок е и процентот на смртност во споредба во овој период минатото лето. На што се должи ваквата состојба, имајќи предвид дека доколку говориме за четвртиот бран на пандемијата тој се очекуваше на есен ?
- Бројките се сериозни и загрижувачки, но не и изненадувачки. Затоа што сите најави кои доаѓаат за Делта сојот од соседните земји, па и од другите европски земји укажуваат дека се работи за исклучително заразна варијанта која многу лесно се шири и мора да се потенцира дека се шири најлесно меѓу неимунизираното население. Ова е уште еден важен момент дека луѓето кои се во болниците, имам информации од колегите кои ги разменуваме, дека се работи главно за неимунизирани луѓе кои пристигнуваат во болница.
Што Ве загрижува најмногу во моментов ?
- Мислам дека е јасно по однос на стратегијата што треба да се прави. Единствен излез во изминативе година и пол се покажува, докажано е дека е имунизацијата. Во оној момент кога населението ќе има општа над 70 или 80% ќе имаме многу подобра ситуација и единствено ме загрижува интересот на граѓаните за имунизација. Мислам дека тоа ни е единствен разумен и докажан излез од кризата. Потребна ни е било каква стратегија која ќе ги убеди луѓето, а нема да ги форсира. Се плашам дека дел од луѓето се чувствуваат притиснати. Јас апелирам да ги гледаат фактите, бројките кои ќе ги кажуваат релевантни институции и релевантни луѓе. Има разно разни приказни, но тоа не се научни факти на кои треба да им се верува. Фактите покажуваат дека оваа есен ќе имаат проблем само оние кои не се имунизирани.
Што покажуваат Вашите анализи, се разбира и научните студии во светски рамки во врска со имунизацијата. Ги следите сите четири вакцини со кои се имунизира. Дали има податоци колку трае имунитетот по вакцинацијата ?
- Најдолго го следиме имунитетот после Фајзер, бидејќи со таа вакцина започнавме со здравствените работници на почетокот во Македонија. И тука сме некаде пред 6 месеци и она што го гледаме е апсолутно охрабрувачки. Антитела и после шест месеци кај најголем дел од вакцинираните кај 99% се уште има. Е сега нема некоја граница или праг ако антителата паднат под 10 имаме проблем со имунитетот, тоа не функционира така. Но од друга страна од оние епидемиолошки студии и мерење на број на заразени од вакцинирани кои доаѓаат претежно од Израел, од Америка и другите кои порано почнаа со вакцинација јасно е дека имунитетот со тек на време опаѓа. Тоа опаѓање не значи дека по шест месеци имунитетот ќе се исклучи и ќе имаме нула заштита од короната. Тоа значи дека по шест месеци од вакцинација е можно инфицирање и тоа е повеќе можно, одошто месец по вакцинација или два месеца. Од таа причина доаѓаат овие иницијативи, тактики за воведување на трета доза која некои земји ја упатуваат на имунодефицитните луѓе, други земји кај повозрасни ја планираат, некои земји пак за сите вакцини. Мислам дека после 6 или после 8 месеци да се размислува и за трета доза дека таа ќе го засили имунитетот за нови шест месеци.
Влегуваме во четвртиот бран, дали може да ни се повторат сликите со карантин на кои сведочевме и претходно. Тука мора да споменам дека поделени се и мислењата на јавноста за почеток на учебната година на 1 септември со физичко присуство ….
- Зависи како народот ќе го прифати вакцинирањето и мораме да имаме на ум дека вакцината нема моментално да ни обезбеди имунитет се вакцинирам денес и од утре е ситуацијата друга. Ефектот од овој зголемен интерес за имунизација ќе го видиме по три четири, па и повеќе недели и очекувам тогаш бројките да почнат да опаѓааат. Мислам дека најлошото е поминато и дека овој четврти бран нема да биде интензивен како претходните.