Деветмина членови од менаџментот на Лекарската комора застанати зад пултот со микрофоните на медиумите – но, ниту еден од докторите ниту видел, ниту знае што пишува во извештајот од Стручниот надзор за родилката Веапоска.
Нивниот колега д-р. Мухамед Асани кој исто така фигурира како член на Извршниот одбор на Комората, денес отсутен.
Во изминатиот период, комисија составена од три до пет доктори и формирана токму од Лекарската комора ја проверуваше неговата работа за случајот во кој родилка остана без повеќе органи. Само тие знаат што утврдиле, а нивните имиња остануваат тајна.
„Со нас денес не е доктор Мухамед Асани. Неговото работење во Извршниот одбор во Лекарската комора е ставено во мирување додека се расчисти целиот случај. Јас не сум дел од работењето на таа комисија и немам увид како претседател, немам слобода да читам документи“ изјави проф. д-р. Калина Гривчева-Старделова, претседателка на Лекарската комора на Македонија.
Во домот на струшкиот гинеколог и директор на болницата Мухамед Асани, Државниот санитарен и здраствен инспекторат во февруари откри нелегална гинеколошка ординација, за што е поднесена и пријава во струшкото обвинителство.
Ниту Веапоска не видела што пишува во извештајот, а од Комората тврдат дека таа не ни побарала – ниту лично, ниту преку нејзиниот адвокат. Сепак, ги охрабруваат другите институции да направат истрага за случајот кој ја потресе јавноста.
„Нашата соработка со било кој државен орган е секогаш отворена и јавна, како и соработката со било кој орган на државата и било кое државно тело. Ние секако дека ќе соработуваме и секако дека нашите ресурси ќе бидат на располагање“ изјави д-р. Илбер Бесими, заменик-претседател на Лекарската комора на Македонија.
Деновиве со свој став излезе и претседателката на антикорупциска комисија и повика докторот Асани да биде разрешен од позицијата директор на струшката болница.
Од Лекарската комора тврдат дека тие – немаат моќ да иницираат такво нешто.
Родилката Веапоска кажа дека самата ќе ја бара вистината за тоа дали органите се нејзини и дали е оправдано тоа што директорот гинеколог Мухамед Асани при породувањето и ги извадил матката, бубрегот и еден јајник. Вели дека ќе ги носи и во приватни клиники и во странство за да ја дознае вистината.
Петар Догов