Демократската партија и идниот претседател Џо Бајден ја освоија контролата врз мнозинствата во Конгресот, откако беше потврдена победата на двајцата нивни кандидати за сенатори од Џорџија.
Рафаел Варнок и Џон Ософ успеаа да ги победат републиканските сенатори Кели Лофлер и Дејвид Пердју, откако претходно во ноември Џо Бајден стана првиот кандидат на демократите кој успеал да победи во државата по 28 години.
Исходот од изборите во Џорџија има исклучително влијание врз мандатот на новиот претседател Џо Бајден. Со победата на Варнок и Ософ, демократите се израмнија со републиканците по бројот на сенатори,, но решавачкиот глас за новото мнозинство ќе биде тој на новата потпретседателка Камала Харис, која со потпретседателската функција е и претседавач на Сенатот. Тоа значи дека Бајден, барем во првите две години од мандатот, многу полесно ќе може да ја спроведува сопствената политика, без потенцијални блокади, во случај републиканците да ја задржеа контролата во Сенатот.