Закон за попис па методологија, или Закон со методологија.
Ова прашање, заедно со барањето за попишување преку отисок од прст ги подвои мислењата на власта и опозицијата до степен што ВМРО ДПМНЕ најавува дека нема да ги почитува резултатите и ќе организира нов попис кога ќе дојде на власт.
Од Заводот за статистика, кој треба да го спроведе пописот, велат дека нема отстапување од европските и светските стандарди.
Попишувањето со отисок од прст го сметаат за неможно бидејќи тоа е класифициран податок со кој располага МВР, не би можело да се опфатат оние што во моментот нема да бидат во земјава, а во базата на податоци ги нема странците и малолетните. Уверуваат дека се ќе биде појасно со методологијата.
„Пописот е статистичка, а не политичка операција“. Потребен е заради креирање политики и рамномерен развој на сите сфери, реагираше и СДСМ.
“Наводната загриженост на ВМРО ДПМНЕ не е ништо друго освен очаен обид пописот да се одложи и дополнително да се политизира. Нашата цел е оваа статистичка операција никогаш повеќе да не се третира како политичко прашање кое ќе зависи од волјата на партиите и партиските лидери. Сите стандарди се задоволени и ќе се преземат сите можни мерки за да се спречи двојно попишување” – тврдат од најголемата владеачка партија.
Законот за попис ќе биде на дневен ред во Собранието на 18-ти јануари, откако во Комисијата за европски прашања беа одбиени сите 40-тина амандмани на опозицијата.
По 19 години, по еден неуспешен обид во 2011-та и по одложувањето во 2020-та, пописот се планира за април годинава.
Соња Николовска