За десетици лица во скопско забавата вчера завршила на најнеславен можен начин – во полициска станица. Гласната музика ја замениле со полициски сирени затоа што во најкризните недели од Ковид-пандемијата се собрале на едно место необрнувајќи внимание на мерките и ограничувањата, што барем на хартија – важат за сите. И не само таму, полицајците ловеле прекршувачи на мерките и во други градови.
Ова е период со многу работа за луѓето во сини униформи. Повеќе денови наназад се зборува за тој оперативен план на безбедносните служби, во кој детално треба да биде опишано како полицајците ќе постапуваат со сите оние коишто се подготвуваат да ја прекршат секоја мерка за да ја дочекаат Новата година на ист начин како што ја дочекале и лани, и преклани и сите изминати години наназад. Министерот за внатрешни работи потсети дека кривични пријави ќе следуваат за сите коишто најигнорантно ќе ги прекршат мерките на новогодишната ноќ.
Полиција и војска на улиците не е единствена рестриктивна мерка, доволно е што угостителските објекти затвораат во 18 часот и не е дозволено групирање – така се превенира ширењето на Корона, одговори министерот на новинарско прашање. Но, тоа не секаде е случај. Полицајци од СВР Скопје заедно со пазарни инспектори на терен провериле 285 угостителски објекти, а во четири затекнале тоа што го барале – непочитување на пропишаното работно време. Сопствениците на ваквите објекти од кои по еден во Аеродром и во Гази Баба и двајца во Сарај – добиле кривични пријави. Во струшко Велешта пак, приведени се двајца сопственици поради работење по дозволеното време, а приведен е и угостител во Тетово.
Петар Догов