Во 92-та година од животот почина професорот Борислав Каранфилски, еден од основачите на нуклеарната медицина во нашата земја, исклучител експерт по патофизиологија и тиреологија.
Тој има исклучително значење и посебен придонес за основањето на амбулантата за заболувања на тироидната жлезда, која ја развивал и унапредувал во континуитет.
Борислав Каранфилски завршил основно образование и гимназија во Куманово а студирал на медицинскиот факултет во Скопје, каде дипломирал 1955-тата година. Две години подоцна ја завршил школата за примена на радиоактивни изотопи во институтот за нуклеарни науки „Борис Кидриќ“ во Винча, Белград.
1977-та година бил избран за редовен професор а професионално се усовршувал во реномирани клиники во Шведска, Англија, СССР и САД.
Во текот на својот професионален живот, вршел повеќе значајни функции во здравствениот систем, бил директор на Институтот за патофизиологија и нуклеарна медицина, шеф на Катедрата за патофизиологија со нуклеарна медицина, декан на Медицинскиот факултет во Скопје и проректор на УКИМ. Соосновач е на лабораторијата за радиоизотопи при Институтот, а бил и претседател на Здружението на нуклеарна медицина на Југославија.
Борислав Каранфилски е автор на повеќе од 180 трудови, кои биле објавени во домашни и странски специјализирани медицински списанија, додека бил автор или коавтор и на 8 учебници и 5 монографии од нуклеарната медицини и патофизиологијата.
За својот придонес во развојот на македонската медицина, добил повеќе значајни награди и признанија, меѓу кои наградата “11-ти Октомври” за животно дело, Орден за заслуги за народ со сребрена ѕвезда, Орден на трудот со златен венец, Орден на заслуги за народ со сребрени зраци, Орден на Републиката со сребрен венец и други.
Погребот на професорот Борислав Каранфилски ќе биде извршен утре на градските гробишта во Скопје.