Надомест за патни трошоци во износ од 20 одсто од чинењето на горивото по изминат километар или закуп на стан во Скопје за најмногу 400 евра.
Ова е опцијата што ја добиваат пратениците кои немаат живеалиште во главниот град, но работата им е во него.
Важи и за сите министри, директори и други функционери во илјада и 200 министерства, агенции, дирекции, јавни претпријатија па дури и регулаторни тела.
Во меѓувреме, секој фунционер може поединечно да се откаже од патните трошоци. Љупчо Николовски и Зоран Заев тоа го направија додека во август ја извршуваа пратеничката функција, а премиерот Заев потврди дека и како прв министер нема да зема надомест, со што лично го исполнува предизборното ветување.
Во Парламентот се револтирани што постојано се потенцира колку земаат пратениците за патен надомест, без објаснување дека имаат и реални трошоци.
Опозицијата предлага поинаков модел за доаѓање на пратениците на работа, со избегнување на јавниот превоз, кој не одговара секогаш на нивните потреби.
Укинувањето или намалувањето на патните трошоци беше изборно ветување на СДСМ.
Минатата недела, спикерот Талат Џафери најави дека доколку од Владата пристигне ваков предлог во форма на закон, ќе бара да важи не само за пратениците туку за сите функционери бидејќи не сака да дозволи од Собранието да се прави карикатура, а пратениците да се претставуваат како извор на зло.
Соња Николовска