Артан Груби од ДУИ денеска прв го доби мандатното писмо од премиерот. Но, стана прв и во уште нешто-застана на позицијата Прв вицепремиер, што за првпат се воведува во Македонија. За тоа денеска специјално беше изменет и деловникот за работа на владата, во кој е додаден зборот „прв„, пред функцијата „вицепремиер„ и е прецизирано дека, токму тој ќе го менува премиерот во негово отсуство. Со тоа, е поедноставена процедурата, наместо да се менува Законот за влада, за што требаше да се расправа и гласа во Собранието, се` се реши со гласање на владата.Оваа нова функција во македонскиот политички систем е дел од коалицискиот договор меѓу СДСМ и ДУИ, во замена за откажувањето на помалиот владин партнер од изборното ветување за прв Албанец-премиер.
Покрај прв вицепремиер, во оваа влада првпат се воведува и позиција вицепремиерско место за спречување корупција и за одржлив развој и човечки ресурси.Таа функција ќе ја извршува Љупчо Николовски, генералниот секретар на СДСМ, кој е избран во парламентот како министер без ресор. Со промените на статутот на партијата кои се очекуваат да бидат кон крајот на септември или почетокот на октомври, Николовски и официјално ќе може да биде дел од извршната власт бидејќи за сега се води како кординатор кој координира ресори во извршната власт.
По доделувањето на мандатите, Заев им порача на министрите да излезат во пресрет на очекувањата на граѓаните.
На седницата министрите беа со маски, но при доделувањето на мандатните писма, наместо „корона„ поздрав, Заев се ракуваше со сите поединечно, вклучително и со министерот за здравство.
Далиборка Демјанска