Оскар Пјастри стигна до петта сезонска победа на трката за Големата награда на Шпанија што денеска се возеше на патеката „Каталуња“ крај Барселона во рамки на Формула 1 шампионатот.
Австралиецот во болидот на Мекларен имаште уште еден доминантен настап и финишираше пред својот тимски колега Ландо Норис. Место на победничкиот подиум како третопласирани имаше и за Шарл Леклер од Ферари.
Џорџ Расел од Мерцедес финишираше на четвртото место. Светскиот шампион Макс Ферстапен иако ја мина целта како петтопласиран, сепак на крајот финишираше на 10.место, бидејќи заработи казна од 10 секунди по контактот со Расел.
Па сега петтото место му припадна на Нико Хулкенберг, а по него следуваат Луис Хамилтон, Исак Хаџар, Пјер Гасли и Фернандо Алонсо.
Пјастри останува лидер во генералниот поредок со 186 бодови, десет повеќе од Норис, додека Ферстапен има 137.
Следната трка во Формула 1 шампионатот, што ќе биде десетта сезонава се вози за Големата награда на Канада на 15.јуни.