Државниот завод за ревизија ги објави конечните извештаи за Универзитетската клиника за хематологија, односно направена е ревизија на две сметки од 2023 година, ревизија на финансиски извештаи и ревизија на усогласеност.
Ревизорите нотираа дека примените и потрошените лекови за ретки болести и лекови од донација не се евидентирани во сметководствената евиденција. Потоа, во делот од спроведените постапки за јавни набавки, констатирана е несоодветна примена на Законот за јавните набавки, како и нехронолошко плаќање на преземените обврски и ангажман на медицински сестри, шалтерски работници и хигиеничари со договор на дело, без обезбедена согласност од Министерството за финансии.
Исто така и Националниот систем за материјално-финансиско и сметководствено работење и Централниот систем за регистрација на работното време при Министерството за здравство, не биле воспоставени во целост, стои во ревизорскиот извештај за работата на Клиниката за хематологија.