Конфликтот меѓу Израел и Хамас се прелеа и во Европскиот парламент (ЕП), каде дошло до „физичка пресметка“ меѓу европратеничка и парламентарна службеничка, и двете од Шведска. Според извори во ЕП, инцидентот се случил кога службеничката наводно ѝ дофрлала забелешки на европратеничката Алис Теодореску Мове околу нејзините ставови поврзани со Израел и војната во Газа, која на тоа возвратила со свои коментари.
Состојбата ескалирала кога службеничката чиј идентитет досега не е објавен, освен тоа дека има потекло од Блискиот Исток, се обидела со својот телефон да ја сними целата ситуацијата, обраќајќи ѝ се на Теодореску Мове со зборовите „Кажи му на светот колку ужасна личност си“. Потоа и европратеничката го извадила телефонот со намера да ја сними службеничката, која се обидела на сила да ѝ го одземе телефонот.
И двете страни поднеле одвоени пријави за случајот до полицијата, додека според извори од ЕП, првичната проценка на снимките „ја потврдува верзијата на европратеничката за настанот“.