Од вкупно 34 општини со седиште во град, ниту една не го исполнува законскиот стандард за озеленетост од 25 метри квадратни по жител, покажува најновиот извештај на Државниот завод за ревизија (ДЗР). Само осум општини имаат важечки Генерален урбанистички план (ГУП), додека повеќето работат со застарени или непостоечки планови.
Ревизорите посочуваат и дека 18 општини немаат донесено годишни програми за одржување на зеленилото, а 59% не инвестирале во нови зелени површини во периодот 2020–2024. Причините за ваквата состојба, според извештајот, се масовната урбанизација, нефункционална координација меѓу институциите, финансирање на урбанистички планови од приватни субјекти и недоволна инспекциска контрола.
Ревизорите предупредуваат дека ваквата состојба го загрозува урбаното живеење, ја намалува квалитетната животна средина и создава нерамноправен пристап до јавни зелени површини за граѓаните. Заводот за ревизија препорачува итни мерки, координација и засилен надзор за да се подобри квалитетот на живот во градовите.