Слабиот административен капацитет ги доведува во прашање плановите за засилени инвестиции во капитални проекти во општините. Решението може да се бара во здружување на општините, но и помош од централната власт.
Премиерот Христијан Мицкоски најави дека 250 милиони евра од унгарскиот заем од 1 милијарда евра ќе бидат наменети за развој на општините, кои ќе треба да подготват проекти и да аплицираат за парите.
Експерти за локална самоуправа со кои разговаравме велат дека на прсти се бројат општините кои имаат капацитет да подготват и да реализираат големи инфраструктурни проекти.
Поранешниот министер за финансии Џевдет Хајредини, во интервју за Радио Слободна Европа, вели дека се покажа дека институциите не можат да ги инвестираат ниту парите што им стојат на располагање.
„За да црпиш пари било од буџетот, било од странските финансиери, тие не ти ги даваат на располагање на жиро сметка, па да си ги земеш. Странците ти даваат, но ќе ги вратиш. Ние немаме административен капацитет да ги црпиме дури и парите кои ни ги даваат на располагање. И сега тие велат ќе има, ама кога. Еве сега ќе дојдат одмори, кога ќе бидат способни општините да ги креираат. Кај им биле досега тие проекти, зашто проектирањето треба да трае долго за извршувањето да трае кратко“, вели Хајредини.
Поранешниот претседател на ЗЕЛС и експерт за локална самоуправа Горан Ангелов вели дека проблем со административните капацитети имаат помалите и рурални општини, и оти ним владата треба да им помогне.
„Тој капацитет може да се компензира со меѓуопштинска соработка, веројатно со здружување на неколку рурални општини или со здружување со онаа општина од која произлегле. Сигурно ќе треба помош и од централните власти, тука е Министерството за локална самоуправа, да не го заборавиме Бирото за регионален развој, и таму има капацитет, тука е Министерството за транспорт и врски. Сигурно дека на почетокот ќе има проблеми, тоа е за очекување, сепак станува збор за поголема сума пари, но да не заборавиме дека се натрупани премногу инфраструктурни проблеми во општините во изминатите 32 години“, вели Ангелов.
Владата најави дека на општините ќе им стави на располагање 250 милиони евра. Парите ќе се делат согласно бројот на жители на општината, а градоначалниците треба да подготват документација и да се пријават на повикот. Парите не можат да бидат наменети за тековни трошоци, туку само за капитални инвестиции, како училишта, градинки, водоводи, канализации и улици.
Срѓан Стојанчов