Во јавниот сектор нема вработено лица од помалите етнички заедници или пак има само мал број. Постои и родова нерамноправност, доминираат мажи во однос на жени, а особено на избрани и именувани лица и раководни места. Овие заклучоци ги покажува последниот извештај на народниот правобранител.
„Обвинителство, судство, социјалната заштита, самостојни државни органи како агенции, дирекции, комисии не бележат никаков раст на подобрување на застапувањето на помалите заедници. Посебно сакам да ја истакнам загриженоста за неспроведување на оваа уставно начело за соодветна и правична застапеност во областа на здравството“, вели Насер Зибери, народен правобранител.
Иако бројот на вработени во јавниот сектор е намален во однос на претходната година, сепак Македонија има најголем број на вработени споредбено со регионот.
„Во 2022 година, постои намалување на бројот на вработени лица и на збирно ниво е намален за 3.722 лица во споредба со минатата година, кога вкупниот бројот на вработени лица изнесувал 134.099 лица, додека сега тој број е 130.377 лица“, додаде Зибери.
Народниот правобранител констатираше мал исчекор во спроведување на начело на соодветна и правична застапеност, но смета дека тој не е доволен. Потребно е да се воспостави систем со јасни правила при вработување.
Тамара Марковска