Производителот на вакцини АстраЗенека демантира дека одбиле да се сретнат со највисоките претставници на ЕУ за да разговара за проблемите со производството на вакцини против коронавирус.
По низа нејснотии, и медиумски препукувања, средбата сепак ќе се одржи вечерва во Брисел.
Извршниот директор на „АстраЗенека“, Паскал Сориот возврати на официјалните претставници на ЕУ кои ја критикуваа лабораторијата за снабдување на значително помалку дози од договореното, велејќи дека неговата компанија сигурно не зема вакцини од Европејците за да ги продава на друго место со профит.
За италијанскиот весник Ла Република, Сориот вели дека неговиот тим работи 24-7 за да ги среди проблемите со производството на вакцините. Вели дека доцнат два месеца од она што било планирано, но обвинува дека ЕУ доцна одлучила да потпише договор со компанијата, со што им се ограничило времето за средување на нарачката. Објаснува дека Велика Британија, која е надвор од блокот, го потпишала договорот три месеци пред ЕУ, и затоа сега ја имаат вакцината.
Сориот вели дека планот е да почнат со достава во февруари, а тоа нема да биде мала доза. Станува збор за милиони дози вакцини кои ќе се достават до ЕУ, вели Сориот.