Почетокот на годинава ќе ги донесе и првите вакцини за населението. Станува збор за околу осумстотини илјади дози од вакцината на Фајзер преку Ковакс механизмот на Светската здравствена организација. Тоа е еден од начините да се донесе кај нас течноста што значи имунитет на Ковид, а тука се и директните договори со компаниите производители како и ветениот процент од некои земји членки на Европската унија – најавува министерот Венко Филипче.
Веќе аплициравме да бидеме во првата група на земји согласно подготвеноста на нашиот систем во однос на чувањето на температура на минус 70 степени, дистрибуцијата и практичната апликација преку центрите за јавно здраво и здравствените домови и да бидеме во првата група на земји коишто ги добиле вакцините. Според нивното писмо станува збор за вакцината на Фајзер, а следна која што доаѓа предвид е вакцината на Астра Зенека, рече филипче.
Филипче оценува дека има подобрување во состојбата со Ковид кај нас: намален е бројот на новодијагностицирани, како и притисокот врз болниците. Тој најави и дека за две недели во аптеките ќе го има лекот Ивермектин, а ќе го препишуваат матичните лекари.
За дилемите во јавноста, зошто наместо интерните одделенија да се ослободат за редовна работа, тие остануваат за Ковид болни, а се затвора модуларната болница на Инфективната клиника, Филипче одговори:
Ова се направи затоа што е попрактичен начин лекарите и сестрите во рамките на своите јавно-здравствени установи да можат да пружаат здравствена услуга. Да не мора физички да ротираат и во модуларната болница. Во било кој момент сме подготвени повторно да ја активираме и се надевам нема да дојде до таква ситуација, вели филипче.
Министерот најави дека ќе се разговара и за релаксирање на мерките за угостителите, но не пред 21 јануари до кога беше и првично скратено работното време до 18 часот.
И покрај најавите дека вакцина набргу ќе има, опозицијата и денеска критикуваше дека Филипче само бара изговори за промашената стратегија за набавка на вакцини
Петар Догов