Од опомена преку парична казна до кривична пријава. Бучавата од кафе-барот „Интермецо“ ќе се гони судски ако обвинителството ја прифати најавената кривична пријава од општина Центар. Граѓаните се жалеле на гласна музика од кафулето, а општината завчера го затвори локалот на 30 дена. Градоначалникот на општина Центар Саша Богдановиќ, најави дека ќе бара од јавното обвинителство да се справи со со одговорните во кафе-барот „Интермецо“.
„По извршените контроли на кафе барот ‘Интермецо’, вчеравечер истиот продолжил со работа и покрај изреченото решение и забраната за работа од 30 дена. Пломбата поставена на влезот на локалот е отстранета што согласно членот 389 од кривичниот законик, претставува кривично дело казниво со парична казна или со затвор до три години. По добивање на записниците, Општина Центар до надлежните органи ќе поднесе кривична пријава за симнување на службен печат“, напиша Богдановиќ на Фејсбук.
Камерата на Телма забележа дека наместо пломба вратата на локалот е ширум отворена, а вработените непречено влегуваат и излегуваат. Одговрните во локалот тврдат дека не ја прекршиле забраната за вршење угостителска дејност, со образложување дека тие во решението на инспекторатот не се соочиле со пломба за локалот. Најавија контра кривична за инспекторот и отшуштање на сите вработени.
Популарното кафуле доби пломба за гласна музика, а по, пријава и поплаки од страна на жителите, инспекцијата констатирала дека локалот ги надминал пропишаните вредности на бучава. Таа казна изнесува 6.000 евра. По добивање на записниците, Општина Центар до обвинителството ќе поднесе кривична пријава за симнување на службен печат, дело за кое е предвидна парична казна или затвор до три години.
Павле Беловски