Предлогот за нов гувернер на Народната банка утре ќе биде доставен до Собранието, а пратениците ќе гласаат во вторник.
Мандатот на актуелната гувернерка Анита Ангеловска Бежоска истекува на 21 мај, по седум години на функцијата. Таа беше првата жена на оваа позиција, избрана со двотретинско мнозинство во 2018 година, со поддршка од сите пратенички групи.
Премиерот Христијан Мицкоски не откри кој е неговиот личен фаворит, но нагласи дека сите кандидати што се разгледуваат се „вонсериски искусни“ и дека клучен услов за поддршка од неговата партија е одржување на макроекономската стабилност и одбрана на фиксниот курс на денарот.
Во јавноста веќе се споменуваат неколку потенцијални имиња за нов гувернер. Меѓу нив се поранешните министри за финансии Зоран Ставрески и Трајко Славески, кој во моментот е претседавач во Советот на Град Скопје.
Се споменуваат и актуелната гувернерка Бежоска, како и Маја Кадиевска Војновиќ, член на надзорниот одбор на КИБС.
Економската фела очекува новиот гувернер да го продолжи процесот на модернизација на монетарниот систем, со фокус на контролата на инфлацијата, стабилен девизен курс и зајакнување на банкарскиот надзор. Народната банка игра клучна улога во одржување на економската стабилност во земјата.