Во Музејот на современа уметност на 8 ноември ќе биде отворена изложбата „Сè што ни е заедничко“. На неа ќе бидат прикажани дела од уметници Роми, чии теми се надвор од доминантниот политички дискурс. Изложбата е организирана во рамки на 14. Европско номадско биенале за современа уметност – Манифеста . А, куратори се Мустафа Асан, Мо Диенер, Мира Гаќина и Јованка Попова.
Музејот на современата уметност е лоциран на простор кој е органски дел од градската целина, во која со години живее ромската заедница, која често е предмет на политичко и општествено исклучување, погрешно претставување, шпекулации и предрасуди.
- Темите со кои се занимаваат уметниците Роми во оваа поставка отвораат различни прашања поврзани со системското насилство врз Ромите и останатите маргинализирани заедници, кризата на идентитетските политики, родова нееднаквост, војна, мигранската криза, холокаустот во однос на денешните светски ултранационалистички политички идеологии, потребата од различна политика на грижа. Целта на изложбата е да ја прошири политичката имагинација надвор од стереотипните претстави и преку споделено знаење од меѓународно познати и домашни уметници да артикулира поинакви начини на себепретставување и да ги централизира и направи видливи игнорираните и недостапни маргинализирани наративи за Ромите“, велат кокуратирките Гаќина и Попова.
Уметници чии дела ќе бидат претставени на изложбата се: Дилејн Ле Бас (Англија), Ахмет Кадри (Северна Македонија), Сеад Казанџиу (Албанија), Лубош Котлар и Роберт Габрис (Словачка), Рома Џем Сешн Уметнички Колектив, Мо Динер, Милена Петровиќ (Северна Македонија/ Швајцарија/Србија), Нихад Нино Пушија (Босна и Херцеговина/Германија), Андре Јено Рацш (Германија), Емилија Ригова (Словачка), Цеија Стојка (Австрија), Ден Тарнер (Англија) и Дурмиш Ќазим (Северна Македонија).
Изложбата „ Сè што ни е заедничко“, ќе биде отворена до 20 февруари 2023 година.