Повеќе од 2.700 граѓани лани побарале заштита од Народниот правобранител поради проблеми со лични документи, постапки од извршители и наплата на комунални услуги. Според омбудсманот Насер Зибери, институциите најчесто реагираат на посебните претставки, но препораките кои би решиле системски проблеми се игнорираат.
Во делот на спроведување на посебните препораки кои се врзани за претставките сме задоволни од институциите. Надлежните соодветно реагираа. Секако не реагираат сите за кратко време и со добар квалитет. Но, кога се работи за општите препораки кои произлегуваат од годишниот извештај сме целосно незадоволни од работата на Собранието и Владата, изјави Насер Зибери, народен правобранител.
Според Зибери главниот проблем е тоа што Собранието со големо доцнење го разгледува годишниот извештај на Народниот правобранител, по што Владата не презема обврска да ги спроведува препораките и не поднесува отчет за своето постапување.
Тука се неколку иницијативи за измени на закони. Предлози за подобрување на состојбата во затворите, предлози за подобрување на работата на извршителската служба и неколку други препораки кои за жал Собранието со задоцнување ги остварува, а Владата не постапува, додаде Зибери.
Поради ваквиот однос на институциите, омбудсманот предупредува дека истите препораки се повторуваат од година во година. Минатата година народниот правобранител постапил по 3.120 претставки, а голем дел од нив биле останати од минатата година.
Тамара Марковска