Хамас соопшти дека започнале нова рунда преговори за прекин на војната во Газа, само неколку часа откако Израел ја започна воената офанзива. Преговорите, според советникот на лидерот на Хамас, Тахер ал-Нуну, се одвиваат во Доха, Катар, без поставени предуслови.
Израелскиот министер за одбрана Израел Кац изјави дека Хамас се враќа на индиректните разговори за договор за заложниците, нарекувајќи го тоа „поместување од нивната дотогашна непопустлива позиција“.
Израелската армија соопшти дека за 24 часа нападнала над 150 цели низ Појасот Газа и дека нема да запре додека Хамас не биде елиминиран и сите заложници не бидат ослободени.
Илјадници израелски војници, вклучително и резервисти, се очекува да влезат во Газа во наредните денови.
Од израелските напади, според Хамас, загинале околу 250 лица, додека здравствените власти јавуваат за најмалку 146 загинати само во последните 24 часа.
Жителите на северна и централна Газа се повторно повикани да ги напуштат домовите, што хуманитарните организации го нарекуваат речиси невозможно.
ОН предупредуваат дека нападите и блокадата на хуманитарна помош можат да претставуваат прекршување на меѓународното право и етничко чистење. САД изразија загриженост за ситуацијата.
Во Газа владее глад и хуманитарна катастрофа. Според ОН, целата популација е под „критичен ризик од глад“.
Израелската офанзива продолжува како одговор на нападот на Хамас на 7 октомври 2023 година, кога беа убиени околу 1.200 лица, а 251 беа земени како заложници. Хамас сè уште држи 58 заложници, додека бројот на загинати во Газа надмина 53.000.